విజయవాడ: ఆంధ్ర ప్రదేశ్ రాష్ట్ర వ్యాప్తంగా ఈ రోజు అనగా శనివారం నిర్వహించిన ‘కోవిడ్ వ్యాక్సిన్ డ్రై రన్‌’ చాలా విజయవంతంగా ముగిసినట్లు ఆంధ్ర ప్రదేశ్ వైద్య ఆరోగ్య శాఖ తెలిపింది. రాష్ట్రంలోని 13 జిల్లాల్లో, ప్రతి జిల్లాకు మూడు చోట్ల చొప్పున 39 చోట్ల కోవిడ్ వ్యాక్సిన్ డ్రై రన్‌ (మాక్ డ్రిల్‌) నిర్వహించారు.
ఈ మాక్ డ్రిల్ల్ లో మొత్తం 956 మంది పాల్గొన్నారు. ఈ డ్రై రన్‌ ప్రక్రియ అంతా వీడియో ద్వారా చిత్రీకరించారు. రాష్ట్ర కార్యాచరణ నివేదికను జిల్లా, రాష్ట్ర స్థాయి టాస్క్‌ఫోర్స్‌కు అందించనున్నారు. కోవిడ్–19 వ్యాక్సినేషన్‌కు సన్నద్ధతలో ఎవైన లోటుపాట్లు జరిగి ఉంటే వాటిని పరిశీలించి సరిదిద్దుకోవడానికి డ్రై రన్‌ ఉపయోగపడుతుందని అధికారులు పేర్కొన్నారు.
దేశంలోని వివిధ ప్రాంతాల్లో నిర్వహించిన డ్రై రన్‌లో భాగంగా డిసెంబర్‌ 28న విజయవాడలోని ఐదు కేంద్రాల్లో డ్రై రన్‌ నిర్వహించిన సంగతి తెలిసిందే. శనివారం కూడా ఏపీ వ్యాప్తంగా డ్రై రన్‌ నిర్వహించారు.