హైదరాబాద్: ఒక నిరుపేద కుటుంబం ఖరీదైన వైద్యం చేయించుకునేందుకు ఆర్థికస్థోమత లేక అల్లాడుతున్న సమయంలో టాలీవుడ్ హీరో సంపూర్ణేశ్‌ బాబు ఆర్థికసాయం అందించి తన ఔదార్యాన్ని చాటుకున్నారు. రాజన్న సిరిసిల్ల మండలంలోని రామన్నపేటకు చెందిన సంకోజి లావణ్య, రమేశ్‌బాబుకు రెండు నెలల క్రితం ఒక బాబు జన్మించాడు.
గత నెల రోజులుగా ఆ చిన్నారి శివ అనారోగ్యంతో బాధపడుతున్నాడు. హైదరాబాద్‌లోని ఓ ప్రైవేట్‌ ఆస్పత్రి వైద్యులు పరీక్షించి గుండె సంబంధిత సమస్యతో బాధపడుతున్నట్లు గుర్తించి తెలిపారు. అలాగే ఆ చిన్నారి వైద్యానికి రూ.10 లక్షలు ఖర్చవుతందని తెలిపారు. వారు నివసిస్తున్న గ్రామస్తులు ఒక లక్ష రూపాయలు విరాళం అందించగా, సోషల్‌ మీడియా ద్వారా విషయం తెలుసుకున్న హీరో సంపూర్ణేశ్‌బాబు శనివారం రామన్నపేటకు వచ్చి చిన్నారి ఆరోగ్య పరిస్థితి అడిగి తెలుసుకున్నారు.
ఈ సందర్భంగా రూ.25 వేల ఆర్థికసాయం అందించారు. రామన్నపేట, బండపల్లి గ్రామాల సర్పంచులు దుమ్ము అంజయ్య, న్యాత విజయజార్జ్‌, మానేరు స్వచ్చంద సంస్థ అధ్యక్షుడు చింతోజు భాస్కర్‌ ఉన్నారు.