హైదరాబాద్: ఇతర రాష్ట్రాలతో పోలిస్తే కరోనా కేసులు చాలా తక్కువగా ఉన్న కేరళలో సినిమా షూటింగ్ ప్రారంభమైంది. ఇంకా, సినిమాలో 50 మంది సభ్యులను మించరాదని ప్రభుత్వం కఠినంగా ఆదేశించింది.
మహారాష్ట్ర ప్రభుత్వం కూడా టీవీ, సినిమాల షూటింగ్ కోసం మార్గదర్శకాలను జారీచేసింది. పరిమిత సిబ్బంది, 65 ఏళ్లు పైబడిన వ్యక్తులపై నిషేధం వంటి నిబంధనలు విధించారు. ఏ సమయంలోనైనా సెట్స్‌లో 50 మంది సభ్యులను మించవద్దని, ప్రతి ఒక్కరూ సామజిక దూరాన్ని పాటించాలని తెలంగాణ ప్రభుత్వం ఇప్పటికే టాలీవుడ్ ప్రతినిధులకు తెలియజేసింది. ఈ నియమాలు భారీ స్థాయిలో నిర్మించబడుతున్నందున “ఆర్ఆర్ఆర్” బృందానికి పెద్ద ఇబ్బంది అవుతుందని అంచనా.
సాధారణ సన్నివేశాలకు కూడా అదనపు సిబ్బందిని నియమించే అలవాటు రాజమౌళికి ఉంది. COVID-19 మార్గదర్శకాలతో సన్నివేశాలను ఎలా చిత్రీకరించాలనే పక్కా ప్రణాళికతో ముందుకు వచ్చిన మొదటి దర్శకుడు ఆయనే. పరిమిత తారాగణం మరియు సిబ్బందితో సన్నివేశాలను చిత్రీకరించగల కార్యాచరణ ప్రణాళికను బృందం సిద్ధం చేసిందని సమాచారం. రామ్ చరణ్, ఎన్టీఆర్ నటిస్తున్న 350 కోట్ల రూపాయల – బహుళ భాషా ప్రాజెక్ట్ 2021 జనవరి కి విడుదల కాదని తెలుస్తున్నది. మొదట షూటింగ్‌ను ముగించుకొని ఆ తరువాత విడుదల తేదీ గురించి ఆలోచించడమే రాజమౌళి ప్రణాళిక.
ఆర్థిక మాంద్యం మరియు కరోనా సంక్షోభం కారణంగా రాజమౌళి మరియు నిర్మాత దానయ్య తీవ్ర ఒత్తిడికి గురవుతున్నారన్నది రహస్యం కాదు. ఈ సంక్షోభ సమయంలో భారీగా ప్రీ-రిలీజ్ వ్యాపారం చేయడం కూడా రాజమౌళికి చాలా కష్టమైన పని.