బెంగళూరు: కర్ణాటక హైకోర్టు కేంద్ర ఆర్థిక మంత్రి నిర్మలా సీతారామన్‌ పై ఎలక్టోరల్ బాండ్‌ల అవినీతి ఆరోపణల కేసులో ప్రాథమిక దర్యాప్తును నిలిపివేస్తూ స్టే ఆదేశాలు జారీ చేసింది. ఎలక్టోరల్ బాండ్‌ల పథకంలో అవినీతికి పాల్పడ్డారనే ఆరోపణలతో గతంలో కేసు నమోదు చేయాలని కోర్టు ఆదేశించింది. ఈ కేసులో దర్యాప్తు కొనసాగకుండా హైకోర్టు స్టే విధించింది, తదుపరి విచారణను అక్టోబర్ 22కి వాయిదా వేసింది.
కేసు నేపథ్యం
బీజేపీ జాతీయ అధ్యక్షుడు జేపీ నడ్డా, మాజీ ఎంపీ నళిన్కుమార్ కటిల్, యడియూరప్ప కుమారుడు విజయేంద్ర, తదితరులపై ఎలక్టోరల్ బాండ్‌ అవినీతి ఆరోపణలతో ఒక వ్యక్తి ఫిర్యాదు చేశాడు. బాండ్లను కొనుగోలు చేయడంలో అవినీతి జరిగిందని ఫిర్యాదు చేసిన ఆదర్శ్ అయ్యర్, దీనిని కర్ణాటక పోలీసులకు సమర్పించగా, పోలీసులు కేసు నమోదు చేయడానికి నిరాకరించారు. ఫిర్యాదు దాఖలైన కేసు నేపథ్యంలో కోర్టు కేసు నమోదు చేయాలని పోలీసులకు ఆదేశాలు ఇచ్చింది.
హైకోర్టు స్టే ఆదేశాలు
నిర్మలా సీతారామన్‌, నళిన్కుమార్ కటిల్, ఇతర నిందితులు హైకోర్టును ఆశ్రయించారు. ఎలక్టోరల్ బాండ్‌ల పథకాన్ని ఫిబ్రవరిలో సుప్రీంకోర్టు రద్దు చేసిందని, వ్యక్తిగత స్వేచ్ఛను ఉల్లంఘించేలా కేసు నమోదు చేశారని నళిన్‌ కుమార్‌ కటిల్ తన పిటిషన్‌లో పేర్కొన్నారు. కటిల్ తరఫున సీనియర్ న్యాయవాది కేజీ రాఘవన్ వాదిస్తూ, ఈ కేసు రాజకీయ ఉద్దేశ్యాలతో దాఖలు అయ్యిందని, ఎలక్టోరల్ బాండ్‌ పథకంలో అవినీతి జరిగిందనే ఆరోపణలు నిరాధారమని వాదించారు.
దీనిపై న్యాయమూర్తి జస్టిస్ ఎం.నాగప్రసన్న ధర్మాసనం విచారణ చేపట్టి, “ప్రతివాదుల నుంచి అభ్యంతరాలు దాఖలయ్యేంత వరకు ప్రాథమిక విచారణ చేపట్టడం చట్ట విరుద్ధమని” వ్యాఖ్యానించారు. ఫిర్యాదుదారుడు ఎలాంటి బాధితుడు కాదని, కేవలం ఈ ఫిర్యాదు ద్వారా ఐపీసీ సెక్షన్‌ 383 వినియోగం గురించి వెల్లడించాలన్న అభిప్రాయంతో ఉన్నారాణి తెలిపారు. ఈ స్టే ఆదేశాలు తదుపరి విచారణ వరకు అమలులో ఉంటాయని ధర్మాసనం స్పష్టం చేసింది.
ఎలక్టోరల్ బాండ్‌లు: కీలక అంశాలు
ఎలక్టోరల్ బాండ్‌లు, రాజకీయ పార్టీలకు నిధులు సేకరించడానికి కేంద్ర ప్రభుత్వం అమలు చేసిన పథకం. కానీ, ఈ పథకం ద్వారా అవినీతి జరిగిందనే ఆరోపణలతో ప్రజా వ్యతిరేక వాదనలు వచ్చినట్లు పిటిషన్ దాఖలయింది. ఈ కేసు పై దర్యాప్తును నిలిపివేసిన హైకోర్టు నిర్ణయం, ప్రధానంగా రాజకీయ వర్గాలలో చర్చకు దారి తీసింది.